किसानको बाजो जग्गामा गुर्जो लगाउदै गुर्जो अभियन्ता राजलवट ।

काभ्रे :- बनेपा नगरपालिका वडा नम्बर १० स्थित जनागालमा बाजो पाखामा जडीबुटी खेती गरिएको छ। गुर्जो अभियन्ता तथा आन्तरिक राजस्व कार्यालय धुलिखेलका प्रमुख कर अधिकृत समेत रहेका कमलबहादुर राजलवटले बाजो पाखोमा जडीबुटीका बिरुवा रोप्न सुरु गरेका हुन ।

जग्गाधनी अर्जुन बजगाई र योगेन्द्र कुँवरले उक्त स्थानमा भएको आफ्नो जग्गाको ३८ रोपनी क्षेत्रफलमा जडीबुटी रोप्नको लागि निःशुल्क खाली जग्गा उपलब्ध गराएपछी गुर्जो अभियन्ता राजलवटले काम सुरु भएको बताए। उनका अनुसार अहिले यहाँ गुर्जी, सयपत्री, लेमनग्रास, गोदावरी, तुलसी, जाइफल, असुरो, पारिजात पथाइचट्टा, स्टेभियालगायतका जडीबुटीका बिरुवा रोपिएका छन् ।

जडीबुटी रोपणका लागि उपलब्ध भएको ३८ रोपनीमध्ये अहिले थोरै क्षेत्रफलमा मात्रै जडीबुटीका बिरुवा रोपिएको बताउदै उनले भने, ‘अहिले सानै क्षेत्रफलमा हामीले जडीबुटीका बिरुवा रोप्न सुरु गरेका छौं। क्रमिक रूपमा बिस्तारै यसलाई विस्तार गर्दै जानेछौं।’ उनको यस कार्यमा उनको परिवारलगायत स्थानीयले पनि सहकार्य गर्दै आएका छन् ।

गुज अभियन्ता राजलवटलाई बनेपासँगै जिल्लाको पाँचखाल नगरपालिकामा पनि जडीबुटी रोपणका लागि निःशुल्क जग्गा उपलब्ध भएको छ । चाँदनी शाहले काभ्रेको पाँचखालस्थित लुईटेल टोलमा रहेको आफ्नो जग्गा जडीबुटी रोप्नको लागि निःशुल्क उपलब्ध गराएकी छन् ।

उक्त स्थानमा गुर्जी, लेमनग्रसालगायतका जडीबुटी रोप्नका लागि जग्गा प्रदान गर्न गरिएको आग्रहलाई शाहले स्वीकार गरेकी हुन्। जडीबुटी रोपण, गोडमेलको काममा राजलवट कार्यालयको समय भन्दा बाहेक पुरै सक्रिय भएर लागेको बताउछ्न ।