चैत ५ मै स्ववियु चुनाब ।

काठमाण्डौ :- आउँदो चैत ५ गते  स्वतन्त्र विद्यार्थी युनियन (स्ववियु)को चुनाव हुन सङ्गठन दर्ताको काम भै सकेको छ । चुनाब हुने  निश्चित भएपछि विभिन्न विद्यार्थी सङ्गठनका नेताहरू आफ्नो पक्षमा माहोल सिर्जना गरिरहेका छन। त्रिभुवन विश्वविद्यालय र आफु अन्तर्गतका  आङ्गिक क्याम्पसहरूमा आफ्नो अस्तित्व जोगाउन विद्यार्थी सङ्गठनहरू आफू अनुकूलका गठबन्धन बनाइ जित निकाल्ने दाउमा देखिएका छन् ।

त्रिभुवन विश्वविद्यालयको केन्द्रीय क्याम्पस कीर्तिपुरसहित ६२ आङ्गिक र १ हजार ४० सम्बन्धन प्राप्त क्याम्पसमा चैत ५ गते नै स्ववियु चुनाव हुने छ । हालको सत्ता साझेदार दल नेपाली काँग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी, लोकतान्त्रिक समाजवादी, नागरिक उन्मुक्ति पार्टी, जनमत पार्टी र राष्ट्रिय जनमोर्चा निकट विद्यार्थी सङ्गठनले गठबन्धन गरेर चुनाव लड्ने तयारी गरेका छन् । सत्तारूढ आठ दलनिकट विद्यार्थी सङ्गठनको मोर्चा बन्ने सम्भावना बलियो देखिन्छ ।

यस्तै नेकपा एमाले निकट अनेरास्ववियु र नेत्रविक्रम चन्द ‘विप्लव’ नेतृत्वको नेकपा निकट अखिल क्रान्तिकारीले चुनावमा तालमेल गर्न छलफल अघि बढाएका छन् । यद्यपि एमाले र विप्लव नेतृत्वको नेकपा विद्यार्थी सङ्गठनको स्ववियुको चुनावी तालमेलका विषयमा निर्णय भइसकेको छैन ।

यस्तै मोहन वैद्य नेतृत्वको नेकपा क्रान्तिकारी माओवादी, धर्मेन्द्र बास्तोला नेतृत्वको नेकपा बहुमत र सन्तबहादुर नेपाली नेतृत्वको नेकपा मसाल निकट विद्यार्थी सङ्गठनले चुनावमा गठबन्धन गरेर जाने निर्णय गरिसकेका छन् ।

स्ववियु चुनावमा उम्मेदवारको २८ वर्षे उमेर हद कायम छ । उमेर हदका कारण धेरै आकाङ्क्षी चुनावबाट वञ्चित हुनुपरेको छ । यसले विद्यार्थी राजनीति गर्न इच्छुकहरूमा चुनावको रौनक पनि हराउँदै गएको छ । यसअघि २०७३ सालमा स्ववियु निर्वाचन भएको थियो । छ वर्षपछि चुनाव हुँदैछ ।

माओवादी केन्द्र निकट अखिल क्रान्तिकारीका महासचिव दिपेश पुनले सत्तारूढ आठ दलनिकट विद्यार्थी सङ्गठन मिलेर जाने विषयमा समझदारी मात्रै भएको बताए । स्ववियु चुनावमा कसरी सहकार्य गर्ने ? कस्तो मापदण्ड बनाउने भन्ने विषयमा फाइनल भई नसकेको पुनले बताए । ‘विचार र एजेन्डा मिल्नेहरूबीच गठबन्धन गरेर चुनाव लड्ने विषयलाई अन्यथा लिनु हुँदैन,’ पुनले भने, ‘चुनावमा सहकार्य गर्नेलाई गठबन्धन बनाउने वा एकका विरुद्ध अर्को हराउने होइन । त्यसलाई स्वाभाविक प्रतिस्पर्धाका रूपमा लिइनुपर्छ ।’